Cebu, Pilipinas

Sinusuportahan ng mga host ang mga first responder sa Pilipinas

Sa isang hindi inaasahang pamamalagi sa Airbnb.org, nagsama-sama ang mga bisita at host para makapaghatid ng mas maraming tulong pagkatapos ng matinding lindol

Dalawang host na magkatabi sa couch habang nakangiti sa camera.

“Hindi ko makakalimutan noong naikuwento sa akin ng isang nakaligtas ang naranasan niya. Sabi niya, nakakatakot iyon pero ayos lang dahil nakaligtas ang lahat ng kapamilya niya. Hindi ganoon ang naranasan sa isang malapit na bahay. May pamilyang namatay.”

- Raffy M., bisita sa Airbnb.org at Executive Director ng Angat Buhay

Noong Setyembre 30, 2025, bago mag-10:00 PM, natamaan ng matinding 6.9 magnitude na lindol ang hilagang bahagi ng lalawigan ng Cebu sa Pilipinas. Pitumpu't siyam na tao ang namatay. Mahigit 128,000 pamilya ang naiulat na naapektuhan at mahigit 18,000 tahanan ang napinsala. Nawasak ang 3,500 mahigit sa mga iyon.

Gusaling gumuho sa kalye dahil sa 6.9 magnitude na lindol sa Cebu, Pilipinas.

Nonprofit na partner ng Airbnb.org ang Angat Buhay na pinapatakbo ng mga Pilipino at itinatag sa diwa ng bayanihan—isang salitang Filipino na kumakatawan sa pagkakaisa at sama-samang pag-aksyon ng komunidad. Mabilis na kumilos ang malaking team nila para tumulong sa mga nakaligtas.Pinapunta ng Executive Director ng Angat Buhay na si Raphael (“Raffy”) M. ang team niya ng mga boluntaryo sa mga naapektuhang lokasyon para maghatid ng iba't ibang anyo ng tulong mula sa mga hygiene kit hanggang sa pangangasiwa ng medikal na tulong kung saan kailangan.

Nagbibigay ng pagkain at mga supply ang mga volunteer mula sa nonprofit na organisasyon na Angat Buhay sa mga residente ng Cebu sa Pilipinas matapos ang 6.9 magnitude na lindol.

“Hindi pa kami nakaranas ng ganoon kalakas na lindol dati, kaya halos hindi kami makapaniwala at hindi namin alam kung paano tutugon. Napakatindi ng pagyanig ng mga gusali sa lahat ng bahagi ng Cebu.”

- Pau G., host sa Airbnb.org

Nasa bahay ang mga Airbnb host na sina Mia S. at Pau G. sa Lungsod ng Cebu noong naramdaman ang unang pagyanig. Bagama't hindi kasinlala ng pinsala sa bandang hilaga ang pinsala sa Lungsod ng Cebu, naramdaman pa rin nina Mia at Pau ang lindol. Nag-alala sila sa mga kapamilya at bisita nila. Noong nalaman nina Mia at Pau ang pagkawasak na naranasan sa hilaga, ginusto nilang tumulong sa kahit anong paraan. Habang sinusubukan nilang makipag-ugnayan sa Angat Buhay para mag-alok na tumulong o magboluntaryo, nakatanggap sila ng notipikasyong na-book ang listing ng tuluyan nila sa Airbnb.org.

Pagkasira ng isang bahay pagkatapos ng 6.9 magnitude na lindol sa Cebu, Pilipinas.

Yakap ng host sa Airbnb.org na si Mia S. ang bisita niya sa Airbnb.org na si Menard mula sa Angat Buhay, isang nonprofit sa Pilipinas.

Pagdating ng mga bisita nina Mia at Pau, nagulat silang mga first responder ang mga iyon mula sa Angat Buhay. Iyon mismo ang team na sinusubukan nilang makaugnayan. “Nakakagulat na ang organisasyon mismong gusto naming makaugnayan ang mamamalagi sa mga tuluyan namin,” sabi ni Mia.Noong pinatuloy nila ang mga miyembro ng team ng Angat Buhay, ikinagalak nina Mia at Pau na nakapagbigay sila ng mapagpapahingahan ng team mula sa isa sa pinakamalalaking network ng boluntaryo sa bansa.

“Malaking tulong ito sa maliliit na organisasyon, lalo sa mga NGO na kaunti lang ang mapagkukunan. Dapat mapunta ang pondo nila sa mga nangangailangan at sa mga pangangailangan ng komunidad.”

- Menard, bisita sa Airbnb.org at kawani ng Angat Buhay

Sabi niya, sa mga nakaraang relief operation, paminsan-minsang natutulog ang mga boluntaryo at kawani sa sahig ng mga opisina nang walang higaan kundi mga kubrekama lang para makatipid. O kaya, pinapatuloy nila ang mga team sa mga hotel. Pero malaki ang nagagastos dito.Iba ang pakiramdam sa pagkakataong ito dahil nabigyan siya at ang iba pang first responder mula sa Angat Buhay ng libreng pang-emergency na matutulugan sa pamamagitan ng Airbnb.org. Nakapagbigay ito sa kanila ng ilang sandali para magpahinga pagkatapos ng 14–16 na oras ng pagboboluntaryo sa mga lugar na naapektuhan at nailaan nila ang kalakhan ng pondo nila sa pagtulong sa mga nakaligtas dahil dito.

Nagbibigay ng mga supply ang isang boluntaryo ng Angat Buhay sa isang bata pagkatapos ng 6.9 magnitude na lindol sa Cebu sa Pilipinas.

“Ang pagtutulungan nang walang inaasahang kapalit. Natural lang ito sa mga Pilipino.”

- Pau G., host sa Airbnb.org

Sa Pilipinas, hindi lang salita ang bayanihan. Mahalagang prinsipyo nito ang diwa ng pagtulong at pakikibahagi sa pasanin. Pagpapahalaga itong nagtatampok sa kakayahan ng bawat indibidwal na mag-ambag sa pag-angat ng lahat sa komunidad.Ayon kay Mia, “Napag-alaman namin dahil sa Airbnb.org na may bagay kaming maiaalok para makatulong sa panahon ng pangangailangan.”

Nakaupo sa couch ang bisita sa Airbnb.org na si Menard kasama ang mga host sa Airbnb.org na sina Mia S. at Pau G. habang nakangiti sa camera.

Umaasa sina Mia at Pau na maging inspirasyon ang kuwento nila sa iba para maging host sa Airbnb.org. Pagkatapos nilang patuluyin si Raffy, sinamahan pa nila siya at ang Angat Buhay bara magboluntaryo rin.Para kina Mia at Pau, buhay ang diwa ng bayanihan sa pagho-host sa Pilipinas man o sa ibang lugar.